Itzuli

Aurtengo Udako Ikastaroetan gizarte ekonomiari lotutako hainbat gai jorratuko dituzte, eta topaketetan lehena ekainaren 22-23an egin da, “Gizarte-kontabilitatea eta informazio ez-finantzarioaren egoerak, fundazioen esparruan” izenburupean.

Euskal Herriko Unibertsitatearen eta Deustuko Unibertsitatearen gidaritzapean eta Eusko Jaurlaritzaren laguntzarekin antolatu den fundazioei zuzendutako topaketan 42 lagunek hartu dute parte, eta 16 hizlarien artean izan ziren FUNKO (Fundazioen Euskal Konfederazioa), Lantegi Batuak Fundazioa, GEAccounting eta Gureak eragileetako ordezkariak, besteak beste.

Ikastaroan jorratutako gaien artean, fundazioek beren asmoari buruz ematen duten informazioa nola jakinarazi eta EBk enpresei eta erakundeei gero eta gehiago eskatzen dien eskariaren eta erregulazioaren alorrak nola landu nabarmendu ziren. Horrez gain, gizarte-kontabilitateak mota horretako erakundeei eskaintzen dizkien aukeraz ere jardun ziren, fundazioek sortzen duten balio soziala identifikatzeko eta interes-taldeei helarazteko.

Gizarte Ekonomiari lotutako gainerako Udako Ikastaroak

Uztailean, halaber, Gizarte Ekonomia izango dute aztegai berriro Udako Ikastaroetan. Uztailaren 14an, hain zuzen, kooperatibismoan jarriko dute fokua, Euskadiko Kooperatiben Goren Kontseiluak antolatutako Atzoko eta gaurko euskal kooperatibismoa ekonomiaren eragile gisa ikastaroan. Hurrengo topaketa hilaren 21ean izango da, ASLEk antolatutako Pertsonen parte-hartzea beren enpresen trantsizio energetikoan izenburupean.